Nakumpleto na ng Department of Public Works and Highways (DPWH) ang proyektong covered court sa Barangay Bayan-bayanan, Dinalupihan. Ang nasabing pasilidad, na may sukat na 17 meters by 30 meters, ay may 14 na poste na gawa sa konkretong pedestal na may taas na 0.60 metro, at nilagyan ng mga steel columns.

Pinuri ni Gobernador Jose Enrique Garcia III ang DPWH sa matagumpay na pagkumpleto ng isa na namang maaasahang imprastraktura. Samantala, binigyang-diin ni Bataan 3rd District Representative Maria Angela Garcia ang kahalagahan ng pasilidad, na magiging venue para sa iba’t ibang mahahalagang kaganapan. “Ang gusaling ito ay magsisilbing lugar para sa mga aktibidad ng paaralan at barangay, pagsasanay, at mga socio-economic events na layuning mapaunlad ang pagiging produktibo ng mga residente, mag-aaral, at kabataan,” ayon kay Rep. Garcia.

Sinabi naman ni DPWH Bataan 3rd District Engineer Maribel Navarro na ang multipurpose facility na ito ay idinisenyo upang parehong suportahan ang paaralan at komunidad, na may partikular na pokus sa komunidad ng Aeta sa nasabing barangay.

Ang proyekto, na nagkakahalaga ng P8 milyon mula sa 2024 General Appropriations Act, ay nagmarka ng mahalagang hakbang tungo sa pag-unlad ng komunidad.

The post DPWH natapos na ang covered court sa Dinalupihan appeared first on 1Bataan.